Dünən sürpriz şəkildə, bəzi OPEC+ ölkələrinin may ayından başlayaraq 2023-cü ilin sonuna qədər neft hasilatını könüllü azaldacaqlarını elan etmələri ilə əlaqədar olaraq neft qiymətləri kəskin yüksəlib. 

Marja.az xəbər verir ki, Bakı vaxtı ilə saat 07:00-a olan məlumata görə, Brent nefti 5,4% bahalaşma ilə 84,17 dollardan, ABŞ xam nefti isə 5,5% bahalaşma ilə 79,80 dollardan ticarət olunub. 

Bu gecə Brent neftinin qiyməti 86,20 dolları da görüb.

Qeyd edək ki, Brent neftinin qiyməti ötən həfətə 79,89 dollardan bağlanmışdı.

Səudiyyə Ərəbistanı və Birləşmiş Ərəb Əmirlikləri (BƏƏ) də daxil olmaqla bir sıra OPEC ölkələri könüllü olaraq 2023-cü ilin mayından neft hasilatını azaltmağa qərar veriblər.Bu ölkələrin neft hasilatını könüllü olaraq azaltmasının ümumi həcmi təqribən 1,5 milyon barel/gün ola bilər.

Səudiyyə Mətbuat Agentliyinin məlumatına görə, Səudiyyə Ərəbistanı gündəlik hasilatı 500 min barel/gün azaldacaq.

BƏƏ Xəbər Agentliyinin yaydığı açıqlamaya görə, BƏƏ hasilatı gündəlik 144 min barel azaldacaq.

Bundan əlavə, gündəlik neft hasilatını İraq 211 min barel barel, Küveyt 128 min barel, Oman 40 min barel və Əlcəzair 48 min barel azaldacaq.

Səudiyyə Ərəbistanının Energetika Nazirliyi qeyd edir ki, hasilatın könüllü şəkildə azaldılması qərarı bir sıra OPEC+ ölkələri ilə razılaşdırılaraq qəbul edilib.

"Bu, neft bazarında sabitliyin qorunmasına yönəlmiş qabaqlayıcı tədbirdir", - məlumatda deyilir.

Bundan əvvəl Qazaxıstanın Energetika Nazirliyi may ayından 2023-cü ilin sonuna kimi hasilatın azaldılacağını elan edib - bu ölkə hasilatı sutkada 78 min barel azaldacaq.

Rusiya baş nazirinin müavini Aleksandr Novak Rusiyanın da hasilatı könüllü olaraq gündəlik 500 min barel azaltmaq qərarını 2023-cü ilin sonuna qədər uzatdığını açıqlayıb. Rusiya Federasiyası mart ayında hasilatı azaltmağa başlayıb.

Alyans ölkələri hasilatın azaldılmasını OPEC+ nazirlər monitorinq komitəsinin aprelin 3-nə planlaşdırılan iclası ərəfəsində elan ediblər.