(®) “Heydər Əliyev İli” çərçivəsində 2023-cü il martın 28-də Azərbaycan Respublikası Elm və Təhsil Nazirliyinin dəstəyi və Azərbaycan Respublikası Dövlət Neft Şirkətinin (SOCAR) təşkilatçılığı ilə “Heydər Əliyev və Azərbaycanın yeni neft strategiyası”  mövzusunda mühazirələrin təşkilinə start verilib.

Tədbirin açılış mərasimi və tələbələr üçün ilk mühazirə Bakı Ali Neft Məktəbində (BANM) təşkil olunub.

Əvvəlcə tədbir iştirakçıları Ulu Öndər Heydər Əliyevin 100 illik yubileyinə həsr olunmuş sərgi ilə tanış olublar.

Azərbaycan Respublikasının dövlət himni ilə başlayan tədbirdə ölkəmizin ərazi bütövlüyü uğrunda canından keçən şəhidlərimizin əziz xatirəsi bir dəqiqəlik sükutla yad edilib.

SOCAR-ın mətbuat katibi Orxan Hüseynovun moderatorluğu ilə keçirilən tədbirdə “Heydər Əliyev İli” çərçivəsində təşkil olunacaq mühazirələr haqqında ümumi məlumat verilib, daha sonra “Ulu Öndər və Azərbaycan gəncləri” adlı videoçarx nümayiş etdirilib.

Açılış nitqi ilə çıxış edən BANM-in rektoru Elmar Qasımov xalqımızın Ümummilli Lideri Heydər Əliyevin müəllifi olduğu yeni neft strategiyasının ölkəmizdə bütün istiqamətlərdə, o cümlədən elm və təhsil sahəsində əldə olunan mühüm nailiyyətlərin təməlini qoyduğunu vurğulayıb.

Azərbaycanın müasir neft strategiyasının əsasının 1994-cü il sentyabrın 20-də “Əsrin müqaviləsi” ilə qoyulduğunu qeyd edən SOCAR-ın vitse-prezidenti Xalik Məmmədov bu sazişin olduqca çətin siyasi və geosiyasi proseslərin baş verdiyi dövrdə Ulu Öndərin müdrik və məqsədyönlü siyasəti nəticəsində imzalandığını bildirib. 1990-cı illərin əvvəllərində Azərbaycanın üzləşdiyi ağır böhran vəziyyətindən bəhs edən SOCAR-ın vitse-prezidenti Ümummilli Liderin yeni neft strategiyasının uğurlu icrası nəticəsində yalnız neft sənayemizin deyil, bütövlükdə ölkəmizin hərtərəfli inkişafının təmin olunduğunu qeyd edib.

Elm və təhsil nazirinin müavini Firudin Qurbanov çıxış edərək Heydər Əliyevin ölkəmizin ən yeni tarixində müstəqil Azərbaycan dövlətinin siyasi, iqtisadi, hüquqi, sosial-mədəni əsaslarını yaradan və inkişafını təmin edən qüdrətli şəxsiyyət olduğunu bildirib.

Firudin Qurbanov gənc nəslin vətənpərvər ruhda yetişdirilməsi, istedadlı gənclərin üzə çıxarılması, dünyanın nüfuzlu ali məktəblərinə təhsil almağa göndərilməsi istiqamətində Ümummilli Lider tərəfindən görülən işlər barədə ətraflı məlumat verib. O, əsası Ulu Öndər Heydər Əliyev tərəfindən qoyulan, Azərbaycan Respublikasının Prezidenti cənab İlham Əliyev tərəfindən uğurla davam etdirildən gənclər siyasəti nəticəsində vətənpərvər ruhda yetişən gənc nəslin 44 günlük Vətən müharibəsində ölkəmizin qazandığı möhtəşəm Qələbədə mühüm rol oynadığını vurğulayıb. Nazir müavini dahi şəxsiyyət Heydər Əliyevin Azərbaycan dövləti və milləti qarşısında misilsiz xidmətlərinin xalqımızın tarixi yaddaşında daim yaşayacağını qeyd edib.

İl ərzində keçirilməsi nəzərdə tutulan silsilə mühazirələr ölkəmizin aidiyyəti  ali təhsil müəssisələrində təşkil olunacaq. Habelə, bir sıra orta məktəblərin şagirdlərinin SOCAR-ın müxtəlif müəssisələrinə səfərləri baş tutacaq.