Zavod istehsalı (laboratoriyada hazırlanmış) brilyantdan ibarət zinət əşyalarının satışı artır, təbii brilyantdan ibarət zinət əşylarının satış isə azalır. Süni brilyantlar təbii olaraq yarananlar ilə eyni görünür. Yalnız nəzərəçarpan fərq qiymət etiketidir.

Marja.az CNN-ə istinadən xəbər verir ki, təbii almaz sənayesindəki ən böyük qorxu istehlakçıların laboratoriyada hazırlanmış brilyantları nişan üzüklərində qəbul etməyə başlamalarıdır. Bu proses əslində baş verir. İstehlakçılar niyə süni brilyantlara axın edirlər? Xərc ən birinci səbəbdir.  Süni brilyant təbii brilyantdan 70% ucuzdur. Lakin süni brilyant ilə eyni kəsimdə və şəffaflıqdadır. Siz təbii almazdan alınmış brilyantı laboratoriyada hazırlanmış çeşiddən ayıra bilməzsiniz.

Laboratoriya almazı (brilyantın xam maddəsi) əsl almazdır, lakin onu hazırlamaq üçün bir neçə həftə lazım olur. Təbii almazlar 800 milyon ilə üç milyard il ərzində əmələ gəlib və onların sonsuz ehtiyatı yoxdur. Bu, təbii almazları baha edir. Digər tərəfdən Rusiyanın Ukraynaya müdaxiləsi təbii xam almazların alınmasını çətinləşdirdiyinə görə qiymətlərin qalxacağı ehtimal edilir. Sanksiyalar birbaşa olaraq qismən Rusiya hökumətinə məxsus olan və ABŞ hökumətinin dünyanın ən böyük almaz hasilatı şirkəti olaraq təyin etdiyi və qlobal almaz hasilatının 28%-ni təşkil edən "Alrosa"nı hədəf alır.

Həmçinin Afrika-nın bəzi almaz mədənlərində uşaq əməyinin istifadəsi də süni brilyantları populyarlaşdırır. 

Hazırda süni brilyantlar təqribən 7% bazar payına malikdir, 2020-ci ildə bu pay 3% idi. 

Bəzi böyük zərgərlik pərakəndə satıcıları süni brilyantları əsas istiqamətə çevirmək üçün səy göstərirlər. 2021-ci ildə dünyanın ən böyük zərgərlik şirkəti "Pandora" təbii brilyantlardan istifadəni dayandıracağını və zərgərlik məmulatlarında laboratoriyada yaradılmış brilyantlara keçəcəyini elan edərək böyük dəyişiklik edib.

"Pandora" istehlakçıların getdikcə daha çox bunu tələb etdiyini bildirib. ABŞ-ın ən böyük zərgərlik şirkəti olan "Signet" (Zales, Kay Jewelers və Jared şəbəkələrinə sahibdir) laboratoriya brilyantlarından ibarət zərgərlik məmulatlarının populyarlığının artdığını bildirib.

Laboratoriyada brilyantlar hazırlayan "Charles and Colvard" markası, istehlakçıların yalnız taxdıqları zinət əşyaları ilə yaxşı görünmək istəmədiklərini, həm də əşyalar ilə özlərini yaxşı hiss etmək istədiklərini bildirib.

"Charles & Colvard"ın prezidenti və baş direktoru Don O'Connell, "Şüurlu istehlakçılıq artdıqca, laboratoriyada hazırlanan brilyantlara tələb artır. İstehlakçılar daşların mənşəyini bilmək və münaqişəsiz olduğuna əmin olmaq istəyirlər. Onlar öz dəyərlərinə uyğun gələn zərgərlik məhsulları almaq seçimini qəbul edirlər”.

Laboratoriyada brilyant hazırlayan VRAI markası, pandemiyanın sosial və ekoloji problemlərə diqqəti artırdığını qeyd edir. İstehlakçıların daha düşüncəli olduqlarını və satın alma vərdişlərini, həmçinin dəstəklədikləri şirkətləri və sənayeləri yenidən qiymətləndirdiklərini bildirib.