ABŞ Mərkəzi Bankının (FED) faiz qərarından sonra Avro Dollar qarşısında 1%-dən çox bahalaşıb. 1 avronun qiyməti 1,09 dolları da keçib. 

Marja xəbər verir ki, Bakı vaxtı ilə saat 22:50-yə olan məlumata görə, Avro/Dollar məzənnəsi 1,22% artımla 1.0902 dollar səviyyəsində olub. Məzənnə 1.0913 səviyyəsini də görüb. 

Dolların Yapon yeninə nisbətdə məzənnəsi əvvəlki 132.49 yen dəyərindən 131.39 yenə düşüb (Dollar ucuzlaşıb, yeni bahalaşıb).

Dollar ucuzlaşdığından Brent neftinin qiyməti 1,9% artaraq 76,72 dollar/barelə yüksəlib.

FED iclasının nəticələrinin dərcindən sonra qızıl və gümüş bahalaşıb. Nyu-Yorkun Comex birjasında qızılın aprel fyuçerslərinin qiyməti 22,1 dollar və ya 1,14% artaraq 1 unsiya üçün 1962,95 dollar təşkil edib. Gümüşün may fyuçersləri 2,15% artaraq bir unsiya üçün 22,9 dollar təşkil edib. Fed-in qərarının açıqlanmasından əvvəl qızıl və gümüş unsiyası müvafiq olaraq 1949 dollar və 22,7 dollar səviyyəsində idi.

Mart iclasının nəticələrinə görə, FED faiz dərəcələrini 0,25 faiz bəndi də artıraraq illik 4,75-5% səviyyəsinə çatdırıb. FED 2023-cü ildə ABŞ iqtisadiyyatının artımı proqnozunu pisləşdirib. ABŞ-ın 2023-cü il üçün ÜDM artımı proqnozu dekabrdakı 0,5%-dən 0,4%-ə endirib, inflyasiya üzrə isə dekabrdakı 3,1%-dən 3,3%-ə yüksəldilib.

FED-in faizləri 0,25 faiz bəndi artırması, artımların sona yaxınlaşdığına işarə kimi qəbul edilir. Bu səbəbdən Dollar ucuzlaşır. 

Federal Ehtiyat Sistemi (FED), son bank böhranı ilə bağlı ehtiyatlı olduğunu qeyd edərək və artımların sona yaxınlaşdığına işarə edib.  2022-ci ilin mart ayından etibarən doqquzuncu faiz artımı ilə yanaşı, faiz dərəcəsini təyin edən Federal Açıq Bazar Komitəsi gələcək artımların qeyri-məyyən olduğuna və əsasən məlumatlardan asılı olacağını qeyd edib. 

“Komitə daxil olan məlumatları yaxından izləyəcək və pul siyasətinin nəticələrini qiymətləndirəcək. Komitə, inflyasiyanın zamanla 2 faizə qaytarılması üçün kifayət qədər məhdudlaşdırıcı olan pul siyasəti mövqeyinə nail olmaq üçün bəzi əlavə siyasət möhkəmlənməsinin məqsədəuyğun ola biləcəyini gözləyir.”

Həmçinin oxu

FED çətin faiz qərarını açıqladı