Böhranda olan Credit Suisse bankı, İsveçrənin ən böyük bankı olan UBS tərəfindən satın alınıb. 

Marja xəbər verir ki, bu barədə  İsveçrə Milli Bankı (SNB) məlumat yayıb.

"Bu gün UBS Credit Suisse-i aldığını elan edib. Bu satınalma İsveçrə Federal Hökuməti, İsveçrə Maliyyə Bazarlarına Nəzarət Təşkilatı (FINMA) və İsveçrə Milli Bankının (SNB) dəstəyi ilə mümkün olub", - məlumatda deyilir.

Qeyd olunur ki, SNB Credit Suisse-in UBS tərəfindən alınması ilə əlaqədar olaraq "əhəmiyyətli yardım" göstərəcək.

Milli Bank , xilasetmənin "maliyyə sabitliyini təmin edəcəyini və İsveçrə iqtisadiyyatını qoruyacağını" qeyd edib.

UBS xəstələnmiş rəqibi Credit Suisse-ni 3,2 milyard dollara satın alıb.

Credit Suisse qlobal maliyyə sistemində 30 ən mühüm bank arasında yer alır və onların birlikdə aktivləri təxminən 1,7 trilyon dollardır.

UBS və Credit Suisse-in qlobal qərargahları Sürixdə bir-birində çox yaxın məsafədə yerləşir. UBS-in səhmləri son iki ildə 15% bahalaşıb və 2022-ci ildə 7,6 milyard dollar mənfəət əldə edib. Refinitiv-in məlumatına görə, cümə günü onun birja dəyəri təxminən 65 milyard dollar olub.

Credit Suisse səhmləri son 2 ildə 84% ucuzlaşıb və keçən il 7,9 milyard dollar "əriyib". Ötən həftənin sonunda bankın birja dəyəri cəmi 8 milyard dollar olub.

1856-cı ildən yaranan Credit Suisse-in kökləri İsveçrənin dəmir yolu şəbəkəsinin genişləndirilməsi və sənayeləşməsini maliyyələşdirmək üçün yaradılmış Schweizerische Kreditanstalt (SKA)-dadır.

Credit Suisse İsveçrənin ikinci ən böyük bankı olmaqla yanaşı, dünyanın ən zəngin insanlarının çoxunun sərvətinə baxır və qlobal investisiya bankçılığı xidmətləri təklif edir. 2022-ci ilin sonunda 50 000-dən çox işçisi var idi.

"Financial Times" xəbər verir ki, 167 yaşlı bankın səhmləri həftə ərzində 25% ucuzlaşıb, onun idarə etdiyi investisiya fondlarından pullar çıxarılıb və bir anda hesab sahibləri gündə 10 milyard dollardan çox əmanət götürüblər. İsveçrə Milli Bankının təcili krediti "qanaxmanı" dayandıra bilməyib.

Credit Suisse illərdir investorların və müştərilərin etibarını itirirdi. 2022-ci ildə o, qlobal maliyyə böhranından sonra ən böyük zərərə düşüb. Lakin keçən həftə mühasibat uçotunda “maddi zəifliyi” etiraf etdikdən sonra, ABŞ-da Silicon Valley Bank və Signature Bank-ın bağlanmaları, artan faiz dərəcələrinin bəzi maliyyə aktivlərinin dəyərini sarsıtdığı bir vaxtda daha zəif qurumlarla bağlı qorxu yaydığından ona inam çökdü və səhmləri kəskin ucuzlaşdı. Satınalma baş tutmasaydı, bazar ertəsi Bankın tamamilə çökəcəyi gözlənilirdi.